क्रेन ढाल्दा घर दुइ चोइटा

अमेरिकाको क्यालिफोर्नियास्थित एक दम्पत्ति घर आइपुग्दा आश्चर्यमा परे, किनभने उनीहरूले सरसाउँदै छोडेको घर बेलुकी कामबाट फर्किँदा दुइ फ्याक परेको थियो ।

कुरा के परेछ भने, उनीहरू बस्ने सान्ता रोसाको स्थानीय निकायले मिसेल र केभिन म्याकर्थीको घर छेउमा उभिएको १ सय ५० वर्ष बूढो रूखलाइ उखेल्नु पर्ने थियो । ओकको यो रूखलाइ ठूलो क्रेनले तुरून्तै उठाइहाल्छ नि भन्ने सोचाइले उखेल्न शुरू के गरिएको थियो, त्यत्रो ठूलो क्रेन आफैँ उनार भइदियो ।

र, यो क्रेन कति मजाले स्लो मोसनमा उनार भइदियो भने, छिमेकी एलिसा डेल्सले यो घटना शायदै अब आफ्ना नाङ्गा आँखाले देख्न पाउँली भन्न थालेकी छिन् ।

यता घरबेटी मिसेल र केभिन बेलुकी घर फर्किँदा उल्टिएको त्यत्रो ठूलो क्रेन र दुइ फ्याक परेको आफ्नो घर देखेर रूनु न हाँस्नुको अवस्थामा पुगेका छन् । रूख उप्काउने बेला घरमा कोही नभएकाले कसैलाइ पनि चोट नलागेको र ग्यारेजमा बसेको कुकुरलाइ पनि कुनै चोट नलागेको समाचारमा जनाइएको छ ।

घरबेटी दुवै चकित परेका छन्¬, पत्रकारहरूलाइ उनीहरूले भने¬, "खै हामी के भनुँ र ? घरको हालत देखेर हाम्रो सातोपुत्लो गयो ।"